CRITICS proiektua abiatu da Donostian

CRITICS kontsorzioak bere lehen kick off bilera egin zuen maiatzaren 5ean eta 6an, Donostiako Gladys del Estal Informatika Fakultatean, EHU, Tilde-VMU, ZHAW eta Université Côte d’Azur/CNRS erakundeetako bazkideekin eta HiTZ taldeko Rodrigo Agerriren lidergopean. Bilera proiektuaren hasiera formala izan zen, eta partzuergoak bere ikuspegia, lan-plana eta lehen urteko lehentasunak bateratzeko balio izan zuen.

EHUko parte-hartzaileen artean, Arantza Rico eta Aritz Ruiz-Gonzalez, IKASGARAIA taldeko kideak, hizkuntza-eredu handietan oinarritutako hezkuntza-baliabideak garatzen lagunduko dute, domeinu zientifikoetan ebaluazio automatikoa eta feedbacka eskaintzeko, ikasleen zientzia-alfabetatzea, argumentazioa eta pentsamendu kritikoa hobetzeko helburuarekin. Eztabaiden ardatzean CRITICSen norabide zientifiko nagusiak izan ziren: Hizkuntza Eredu Handien egokitzapena zientzia-domeinura, itzulpen automatikoa, argumentazioa eta ebaluazioa. Hurrengo aurrez aurreko bilera urrian egingo da Nizan.